Sumqayıtda yerləşən 2 nömrəli Ailə Sağlamlıq Mərkəzinin əvvəl fəaliyyət göstərdiyi binanın hazırkı vəziyyəti narahatlıq doğurur.
Sumqayit24.az-a müraciət edən vətəndaşların sözlərinə görə, sözügedən tibb müəssisəsi təmirə bağlanılsa da binada heç bir iş görülmür.
"Artıq təxminən 2 ildir ki, bina təmirə bağlanıb. Lakin bu müddət ərzində heç bir iş görülməyib. Binanın balkon hissələri qəzalı vəziyyətdədir və dağılma təhlükəsi var. Bundan əlavə, ərazidə təhlükəsizlik tədbirləri də görülməyib. Belə vəziyyət isə yaxınlıqdan keçən vətəndaşlar üçün ciddi risk yaradır", - deyə sakinlər bildiriblər.
Məsələ ilə bağlı Sumqayit24.az-ın sorğusuna Sumqayıt Tibb Mərkəzindən bildirilib ki, hazırda sözügedən yerdə tibbi fəaliyyət həyata keçirilmir.
"Ailə Sağlamlıq Mərkəzinin fəaliyyəti yeni məkana köçürüldüyündən, sözügedən bina istifadədən çıxarılıb və vətəndaşlara tibbi xidmət göstərilməsi dayandırılıb. Binanın texniki vəziyyəti ilə bağlı mövcud vəziyyət aidiyyəti üzrə müvafiq dövlət qurumlarının diqqətinə çatdırılıb və bu istiqamətdə rəsmi prosedurlar icra olunub.
Qeyd edirik ki, bina üzrə təhlükəsizlik risklərinin aradan qaldırılması məqsədilə zəruri tədbirlər planlaşdırılıb və 2026-cı il üçün təmir işlərinin aparılması nəzərdə tutulur. Müvafiq işlər aidiyyəti qurumların səlahiyyətləri çərçivəsində həyata keçiriləcək.
Vurğulayırıq ki, hazırda sözügedən binada Sumqayıt Tibb Mərkəzinin tabeliyində olan hər hansı bir tibb müəssisəsi fəaliyyət göstərmir və vətəndaşların təhlükəsizliyinin təmin olunması əsas prioritetdir",- deyə məlumatda qeyd edilib.
