Bu gün sumqayıtlı şəhidlərimizin doğum günüdür.
Doğum günü olan şəhidimiz Samir İslamov 1983-cü il fevralın 5-də Sumqayıt şəhərində anadan olub.
Azərbaycan Ordusunun kapitanı olan Samir İslamov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Tərtər rayonunun Talış qəsəbəsinin azadlığı uğrunda gedən döyüşlərdə savaşıb. Oktyabrın 9-da Talış döyüşləri zamanı şəhid olub. Sumqayıt şəhərinin Şəhidlər Xiyabanında dəfn olunub. Ailəli idi. Dörd övladı yadigar qalıb.
Prezident İlham Əliyevin Sərəncamlarına əsasən Samir İslamov ölümündən sonra "Vətən uğrunda", "Suqovuşanın azad olunmasına görə", "III dərəcəli Rəşadət" və "Hərbi xidmətlərə görə" medalları ilə təltif edilib.
***
Şəhidimiz Asim Kinyaz oğlu Camalzadə də 5 fevral 1994-cü ildə Sumqayıtda anadan olub. Sumqayıt şəhər 16 saylı tam orta məktəbində təhsil alıb. Azərbaycan Silahlı Qüvvələrinin sıralarında hərbi xidmətdə olub. Hərbi xidmətini bitirdikdən sonra Azərbaycan Daxili İşlər Nazirliyinin Əlahiddə Çevik Polis Alayında xidmət edib.
Azərbaycan Daxili İşlər Nazirliyinin Çevik Polis Alayının çavuşu olan Asim Camalzadə Azərbaycan Respublikasının Silahlı Qüvvələri tərəfindən 20 sentyabr 2023-cü il tarixində həyata keçirilmiş uğurlu lokal antiterror tədbirləri zamanı Xocavənd rayonunda şəhid olub. Sumqayıt Şəhidlər Xiyabanında dəfn edilib. Subay idi.
Prezident İlham Əliyevin Sərəncamına əsasən, ölümündən sonra "Vətən uğrunda" medalı ilə təltif edilib.
