Sumqayıt şəhərində fəaliyyət göstərən 6 nömrəli marşrut xəttində istismar olunan avtobusların kiçik tutumlu olması sakinlərin narazılığına səbəb olub.
Məlumatına görə, sərnişinlər xüsusilə pik saatlarda avtobuslarda sıxlıq yarandığını, bəzi hallarda isə nəqliyyat vasitəsinə minməyin mümkün olmadığını bildirirlər.
Sakinlərin sözlərinə görə, səhər və axşam saatlarında marşrut üzrə hərəkət edən avtobuslar tələbatı tam ödəyə bilmir. Bu isə həm vaxt itkisinə, həm də əlavə narahatlığa səbəb olur. Onlar qeyd edirlər ki, əhalinin sıx yaşadığı ərazilərdən keçən marşrutda daha böyük və iritutumlu avtobusların istifadəsi məqsədəuyğun olardı.
Məsələ ilə bağlı Sumqayıt Şəhər İcra Hakimiyyətindən bildirilib ki, 6 nömrəli avtobuslarla bağlı yaranmış vəziyyət nəzarətdədir. Qurumdan verilən açıqlamaya əsasən, gələcəkdə 6 nömrəli marşrut xəttində fəaliyyət göstərən avtobusların iritutumlu avtobuslarla əvəz olunması nəzərdə tutulur.
Mənbə: Xeberle.com
