Sumqayıt sakinini rüsvay edəcəklərini bildirirək ona hədə qorxu gələn şəxslər məhkəmənin hökmündən narazıdırlar.
Pravda.az-ın məlumatına görə, Ali Məhkəmədə hədə-qorxu ilə tələb etmədə təqsirləndirilən M.Məcidli və onun qeyri-rəsmi münasibətdə yaşadığı S.Nəsibovanın barəsindəki qərardan verilən kassasiya şikayətinə baxılıb və kassasiya şikayəti təmin edilməyib.
İttihama əsasən, M.Məcidli sevgilisinə məxsus telefonun "Instagram" tətbiqində "gunel_agayefha" adlı səhifə yaradaraq "WhatsApp" nömrələrinin gizli izlənməsi ilə bağlı elan yerləşdirib. Eyni səhifəni özünə məxsus telefonda da açıb. Bundan əlavə, S.Nəsibovanın adına kart alaraq onu nəzarətində saxlayıb və kartı tətbiqdən qeydiyyatdan keçirib.
2023-cü ildə həmin səhifəyə müraciət edən zərərçəkmiş Sumqayıt sakini S.S.-dən (şərti ad) izləmə xidməti adı ilə əvvəlcə 50 manat alınıb. Lakin M.Məcidli S.S.-i aldadaraq ona vəd edilən izləmə proqramına dair heç bir link göndərməyib. Əksinə, yazışmalar izlənilməsi nəzərdə tutulan şəxsə göndərilərək S.S. rüsvayedici məlumatların yayılması ilə hədələnib və ondan əlavə 150 manat tələb olunub. Zərərçəkmiş şəxs bu məbləği də köçürüb.
Təqsirləndirilən şəxslər S.S. ilə yanaşı daha üç nəfərə qarşı da eyni üsulla hədə-qorxu tətbiq edərək ümumilikdə 1000 manat ələ keçiriblər.
Sumqayıt Ağır Cinayətlər Məhkəməsinin hökmü ilə M.Məcidli 5 il müddətinə azadlıqdan məhrum edilib və cəzasını ümumi rejimli müəssisədə çəkməsi müəyyən olunub. S.Nəsibova da CM-in 182.2.1 və 182.2.2-ci maddələri ilə 5 il azadlıqdan məhrum edilib. Lakin CM-in 79.1-ci maddəsi tətbiq edilərək, himayəsində olan iki azyaşlı uşağın 14 yaşına çatanadək cəzanın icrası təxirə salınıb.
Apellyasiya və daha sonra kassasiya şikayətləri təmin edilməyib, əvvəlki məhkəmə qərarları qüvvədə saxlanılıb.
