Sumqayıtın “Xəzər bağları” yaşayış massivində içməli su ya kəsilib, ya da fasilələrlə verilir.
Sumqayit24.az xəbər verir ki, bu barədə sosial şəbəkədə Elçin Həsənzadə adlı şəxs məlumat paylaşıb. O bildirib ki, minlərlə sakin 25 gündür aidiyyəti quruma və 995 zəng çağrı mərkəzinə müraciət edir. Lakin problemin həllinə soyuq münasibət göstərilir.
Sakinlərin sözlərinə görə, 5 ildən coxdur “Xəzər bağları” yaşayış massivində içməli su problemi öz həllini tapmır. Şikayətçilər iddia edirlər ki, idarənin nəzarətçi və rəhbər şəxsləri sakinlərə verilməli olan suyu yeni tikilən hündürmərtəbəli binalara və hansısa məmurun bağına satırlar.
Həmçinin qeyd edilir ki, şikayətə cavab olaraq idarə rəisi qəsəbəyə lazımi səviyyədə su verildiyini deyir. Şikayət məktubunda isə vurğulanıb ki, əraziyə nümayəndə göndəriləndə su nisbətən az da olsa, gəlir. Nümayəndə gedən kimi, su da kəsilir.
