Prezident İlham Əliyevin Sərəncamı ilə Dövlət Statistika Komitəsinin sədri təyin olunan Azər Mursaqulov Sumqayıtda çalışmış 20 Yanvar şəhidinin oğludur.
Sumqayit24.az xəbər verir ki, yeni sədrin atası İsmayıl Həsən oğlu Mursaqulov 1990-cı ildə 20 Yanvar hadisələri zamanı şəhid olub.
O, Sumqayıt Polimer Materialları İnstitutunun ən potensialı və perspektivli şöbə müdirlərindən biri idi.
İsmayıl Mursaqulov 1939-cu il noyabrın 13-də Gürcüstan Respublikası, Marneuli şəhərində qulluqçu ailəsində anadan olub. 1958-ci ildə orta məktəbi qızıl medalla bitirib. Həmin ildə Azərbaycan Dövlət Universitetinin Kimya fakültəsinə qəbul olunub və oranı 1963-cü ildə fərqlənmə diplomu ilə qurtarıb.
1990-cı il yanvarın 20-də Sovet İmperiyasının Bakı şəhərinə qoşun yeridərək xalqımızın başına gətirdiyi vəhşi cinayət qurbanlarından biri də professor İsmayıl Həsən oğlu Mursaqulovdur. O, 1990-cı il yanvarın 24-də qanlı yanvar hadisələri zamanı Bakıdan Sumqayıta həmkarları ilə birlikdə işə gedərkən Sovet hərbçilərinin vəhşiliyi nəticəsində ağır xəsarət alıb.
Həmin vaxt Sumqayıt yolunun kənarında dayanmış "Jiquli" maşını tank kolonunun keçib getməsini gözləyirdi. Maşında Elmlər Akademiyasının üç alimi, biri qadın olmaqla üç professoru vardı. Onlar paytaxtdan Sumqayıta, neçə ildir birgə çalışdıqları Polimer Materialları İnstitutuna gedirdilər. Tanklardan biri kolondan ayrılaraq həmin maşının üstündən keçib. Bu hadisədə ölümcül zədə alan İsmayıl Mursaqulov fevralın 3-də vəfat edib.
Professor Şəhidlər Xiyabanında dəfn olunub.
