Mənzil İnşaatı Dövlət Agentliyinin (MİDA) həyata keçirdiyi sosial mənzil layihələri çərçivəsində bir neçə şəhərdə, o cümlədən Sumqayıt Yaşayış Kompleksində mənzillərin güzəştlə satışı keçiriləcək. Satış prosesi 9 dekabr 2025-ci il saat 11:00-da başlayacaq və 12 dekabr 2025-ci il saat 11:00-da başa çatacaq.
Mənzillərin seçimi "Elektron hökumət" portalı üzərindən fəaliyyət göstərən "Güzəştli Mənzil" sistemi vasitəsilə həyata keçiriləcək. Bu müddət ərzində güzəştli mənzil almaq hüququ olan vətəndaşlar sistemə daxil olaraq seçim edə biləcəklər.
Layihə çərçivəsində inşa edilən yaşayış kompleksləri müasir standartlara uyğun qurulub, sosial infrastruktur, istirahət zonaları və abadlıq işləri ilə təmin olunub. Bu təşəbbüs vətəndaşların mənzil şəraitinin yaxşılaşdırılmasına və sosial rifahın artırılmasına yönəlib.
Bəs, Sumqayıt Yaşayış Kompleksində və digər şəhərlərdə satışa çıxarılan mənzillər daşınmaz əmlak bazarına necə təsir göstərəcək?
Mövzu ilə bağlı Trend.az-a açıqlamasında əmlak eksperti Ramil Osmanlı bildirib ki, MİDA tərəfindən satışa çıxarılan mənzillərin daşınmaz əmlak bazarına, xüsusilə də mənzil bazarına ciddi təsiri gözlənilmir.
Ekspert qeyd edib ki, bu mənzillərin sayı ümumi bazarla müqayisədə çox azdır və bazar dövriyyəsinin hətta 1 faizini belə təşkil etmir:
"Ona görə də qiymətlərə və ümumi bazar göstəricilərinə əhəmiyyətli təsir göstərməsi real deyil. Bu mənzillər ən azı üç ildən əvvəl bazar dövriyyəsinə qayıda bilməz, çünki alıcılar onları kreditlə alır və öhdəliklər bitmədən satış mümkün olmur. Yalnız müqavilə tam başa çatdıqdan sonra bu mənzillər bazara çıxa bilər".
Ramil Osmanlının fikrincə, hətta bu mənzillər üç ildən sonra bazara qaytarılsa belə, onlar artıq dövlət güzəştləri olmadan, mülkiyyətçilər tərəfindən bazar qiymətləri ilə satılacaq:
"Bu səbəbdən hesab edirəm ki, həmin satışların ümumi mənzil bazarına qiymət baxımından təsiri gözlənilmir".
Digər əmlak eksperti Elnur Azadov isə bildirib ki, bu satışlar ümumi bazar dövriyyəsi ilə müqayisədə çox kiçik həcmdədir:
"Üstəlik, tələbat yüksək olduğuna görə mənzillər qısa müddətdə satılır. Bu vəziyyət əsasən Bakı, Abşeron və Gəncə üçün xarakterikdir".
Ekspert əlavə edib ki, regionlarda vəziyyət bir qədər fərqlidir – orada bu tip mənzillərə maraq aşağı olur:
"Regionlarda qiymətlər daha münasib olduğuna görə, alıcılar ipoteka ilə mənzil almaqdansa, torpaq sahəsi alıb öz evlərini mərhələli şəkildə tikməyə üstünlük verirlər. Bu üsul həm daha rahat, həm də maliyyə baxımından daha sərfəlidir".
Beləliklə, mütəxəssislərin fikrincə, güzəştli mənzillər sosial baxımdan mühüm təşəbbüs olsa da, ümumi mənzil bazarında qiymət dəyişikliklərinə səbəb olmayacaq.
