"Araz-Naxçıvan"ın dörd futbolçusu "Sumqayıt"a qarşı oyunu buraxacaq.
Sumqayit24.az bu barədə Naxçıvan təmsilçisinin mətbuat xidmətinə istinadən xəbər verir. Miço Kuzmanoviç, Bəxtiyar Həsənalızadə, Mustafa Əhmədzadə və Əyyub Allaş zədə səbəbindən Premyer Liqanın 29-cu turunda meydana çıxmayacaq.
Sezar Meza Kolli və İssuf Paro ilə bağlı isə baş məşqçi Elmar Baxşıyev qərar verəcək. "Qarabağ"a 1:0 hesabı ilə qalib gəldikləri Azərbaycan Kubokunun yarımfinal mərhələsinin ilk oyununda xəsarət alan Paronun zədəsinin ciddi olmadığı bəlli olub. Oyunçunun əzələsində gərginlik aşkarlanıb.
Qeyd edək ki, "Araz-Naxçıvan" - "Sumqayıt" qarşılaşması bu gün saat 18:00-da start götürəcək.
