Sumqayıtlı paralimpiyaçısı İlham Zəkiyev hava limanında qarşılayan jurnalistlərə açıqlama verib.
Sumqayıt24 xəbər verir ki, 44 yaşlı idmançı zədə səbəbindən oyuna yaxşı hazırlaşa bilmədiyini bildirib:
“Təəssüf ki, zədələrim ucbatından istədiyim kimi hazırlaşa bilmədim. Lakin buna baxmayaraq, vətənə bürünc medalla döndüm. Ümumiyyətlə, Olimpiadada və Paralimpiya Oyunlarında istənilən medal qələbə deməkdir”.
Birinci görüşündə fransalı rəqibinə məğlub olan idmançının sözlərinə görə, həmin qarşılaşmada “hakimlərin tərəfkeşliyini edirdilər”.
İkiqat paralimpiya çempionu uğurunun sirrini də paylaşıb: “İnsan öz üzərində çalışsa, hər şeyi mümkün edə bilər. Mümkün olmayan şey yoxdur. İşini sevə-sevə yanaşanda nəticə əldə edilir”.
Xatırladaq ki, Fransanın paytaxtı Parisdə keçirilən Yay Paralimpiya Oyunlarında yüksək nəticələr əldə etmiş Azərbaycan idmançılarının növbəti qrupu vətənə qayıdıb.
