“Sumqayıt”ın mətbuat xidmətinin rəhbəri Zaur Xudiyev stadionla bağlı sualları cavablandırıb. Sumqayıt24 bu haqda 25 oktyabr tarixində Report.az-a istinadən xəbər verir.
O, komandanın Mehdi Hüseynzadə adına şəhər stadionuna nə vaxt köçəcəyi məsələsinə münasibət bildirib. Klub rəsmisinin sözlərinə görə, arena ilk növbədə “kimyaçılar”ın sərəncamına verilməlidir:
“Stadion Sumqayıt Şəhər İcra Hakimiyyəti tərəfindən tikilib, qazon, oturacaqlar, “sky box” hazırdır. Ancaq oyun keçirmək üçün təkcə bunlar kifayət deyil. Əvvəla, stadion “Sumqayıt”ın sərəncamına verilməlidir. Yəqin ki, Sumqayıt Şəhər İcra Hakimiyyəti ilə klub arasında anlaşma olacaq”.
Z. Xudiyev əlavə edib ki, arenada bir sıra nüanslar Premyer Liqa oyunları üçün uyğunlaşdırılmalıdır:
“Bura işıqlandırma, tablo, internet xətti, jurnalistlər, qonaqlar üçün yer, paltardəyişmə otaqları və sairə aiddir. Bu xırda məsələlər həll olunduqdan sonra AFFA və PFL-in nümayəndələri tərəfindən baxış keçiriləcək. Yarışlara məsul qurumlar razılıq verdikdən sonra komandamız yeni stadionda oyun keçirə biləcək”.
