"Sumqayıt"ın məşqçisi Seymur Rəhimov aldığı iki oyunluq cəzadan danışıb. Sumqayıt24 bu haqda 3 aprel tarixində xəbər verir.
Mütəxəssis Premyer Liqanın 28-ci turunda "Araz-Naxçıvan"la ev matçının (1:0) sonlarında qırmızı vərəqə alıb. O, həmin dəqiqələrdə hər kəsin əsəblərinin gərgin olduğunu xatırladıb:
"Texniki zonada ayaqüstə idim, auta çıxan top düz üstümə gəldi. Mən də tutub meydana atdım ki, oyunun bərpası ləngiməsin. Hakim yaxınlaşıb sarı vərəqə göstərdi. Ondan soruşanda ki, çıxmış topu meydana atdığıma görə niyə vərəqə göstərir, qayıdıb birbaşa qırmızı vərəqə verdi. Nəyə görə cəzalandığımı mən də anlamadım. İstəyirəm ki, hakimlər belə məqamlarda diqqətli olsunlar, oyunun ab-havasını, gedişatı, gərginliyi nəzərə alsınlar".
O, cəzaya razı olacaqlarını vurğulayıb:
"Təəssüf ki, növbəti iki matçda komandamın yanında, texniki zonada ola bilməyəcəyəm".
