İrandan narkotik gətirən şəxslər Sumqayıtda saxlanılıblar. Sumqayıt24 bu haqda 24 may tarixində Daxili İşlər Nazirliyinə (DİN) istinadən xəbər verir.
Xəzər dənizinin İran sahillərindən qayıqlarla ölkəyə narkotik vasitələri qaçaqmalçılıq yolu ilə gətirən mütəşəkkil dəstənin əsas üzvləri - əvvəllər məhkum olunmuşlar Elşad Əliyev və Zakir Nağıyev Narkotiklərlə Mübarizə İdarəsinin əməkdaşları tərəfindən Yaşma bağlarında tutulublar.
Onların üzərində və Zakir Nağıyevin idarə etdiyi avtomobildə ümumilikdə 187 kiloqram, o cümlədən 113 kiloqram tərkibi psixotrop maddələr əlavə edilərək zənginləşdirilən marixuana, 37 kiloqram heroin, 36 kiloqram metamfetamin, 1 kiloqram tiryək və 5 min ədəd "Metadon M40" həbi aşkarlanıb.
Məlum olub ki, Elşad Əliyev və Zakir Nağıyev vaxtaşırı olaraq Rəsul, Rza və şəxsiyyətləri araşdırılan digər İran vətəndaşları ilə əlbir olaraq narkotikləri dəniz yolu ilə ölkəyə gətiriblər. Onlar nakotikləri Bakı şəhərində ayrı-ayrı şəxslərə ötürərək satışını təşkil etməli imişlər. Saxlanılanlar ifadələrində dəfələrlə İrandan xüsusi katerlərlə Xəzər rayonu, Zirə qəsəbəsində hər kəsin “qartalın burnu” kimi tanıdığı yerə göndərilən narkotikləri xüsusi texniki vasitələrdən istifadə etməklə əldə etdiklərini və satdıqlarını bildiriblər.
Qeyd edək ki, Elşad Əliyev va Zakir Nağıyev ətrafda şübhə oyatmamaq üçün ilk baxışdan hər kəsdə balıqçı görüntüsü yaradıblar.
Faktla bağlı cinayət işi başlanılıb, hər 2 şəxs barəsində həbs qətimkan tədbiri seçilib.
