Ötən gün Sumqayıt Dövlət Dram Teatrının aktyoru Oktay Mehdiyevin doğum günü olub. O, uzun illər Sumqayıt Dövlət Dram Teatrının aktyoru kimi fəaliyyət göstərib. Eyni zamanda bədii filmlər və seriallarda müxtəlif obrazlar yaradıb. 9 may 2024-cü il tarixdə isə Prezident Mükafatına layiq görülüb.
Sumqayit24.az–ın əməkdaşı ötən gün 48 yaşını qeyd edən aktyor Oktay Mehdiyev ilə həmsöhbət olub.
Müsahibəni təqdim edirik:
- Oktay bəy, öncə özünüz haqqında qısa məlumat verməyinizi istərdim.
- Mən Oktay Nüsrət oğlu Mehdiyev 1976-cı ildə Sumqayıt şəhərində anadan olmuşam. 1994-cü ildə orta məktəbi bitirib, Azərbaycan Dövlət Mədəniyyət və İncəsənət Universitetinin “dram və kino aktyoru” fakültəsini daxil oldum. 1998-ci ildə ali təhsili başa vurub, hərbi xidmətə yollandım. 1999-cu ildən indiyədək Sumqayıt Dövlət Dram Teatrının aktyoru kimi fəaliyyət göstərirəm.
- 48 illik ömrünüzü necə qiymətləndirirsiniz?
- Ötən gün 48 yaşım tamam oldu. 48 illik ömrümdə o qədər şeylər olub ki.. Burada hamısını demək olmur. Mənim ümumilikdə səhvlərim də, doğrularım da çox olub. Böyük səhvlər buraxmadığım üçün sevinirəm. Bu günümüzə şükür. Narazılığım yoxdur. Ruhum rahatdır.
- Keçmiş günlər yəqin ki, yada düşür. Necə deyərlər, yada düşər xatirələr. Dünənə qayıtsaydınız nələr edərdiniz? Dünənizi bu gününüzə dəyişərdiniz?
- Keçmişlə bağlı xatirələr çoxdur. Lakin keçmiş bir də olmayacaq. Bu günlə yaşamaq lazımdır. Bu günü fikirləşmək lazımdır. Bu günümdə də yaxşı nələrsə var. Dünəni bu günümə dəyişmərəm. Nə olubsa, onu yaşamışam və peşman deyiləm.
- Necə oldu ki, bu sahəyə marağınız yarandı?
- Əslində bu sahəyə mənim çox da marağım olmayıb. Anlayışım da az olub. Uzun məsələdir. Bu barədə çox danışmışam. Hərdən fikirləşirəm ki, həyatım yəqin teatrda yazılıb, aktyor olmalı imişəm. Qismət belədir.
Foto açıq mənbələrdən
- Ailənizdə incəsənətlə məşğul olan var?
- Ailəmdə incəsənətlə məşğul olan yoxdur. Təkcə mən incəsənət sahəsindəyəm.
- Teatrlarda rejissor çatışmazlığı olduğu deyilir. Siz nə düşünürsünüz?
- Ola bilər. Amma yaxşı rejissorlar da var. İnandığımız və dəyər verdiyimiz rejissorlar az deyil.
- Sumqayıt Dövlət Dram Teatrında nə kimi problemlər var?
- Teatrımızda problemlər var. Bizim teatrımıza yeni direktor Samir Şəfiyev təyin olunub. Ona inanırıq. Bir qədər dəstək olsaq, o bizim teatrımız üçün nələrsə edə bilər.
- Hazırda teatrınızda aktyor və ya rejissor çatışmazlığı varmı?
- Hazırda Sumqayıt teatrının baş rejissoru Firudin Məhərrəmovdur. Aktyorların çoxu onun tamaşasında rahat olur. Bakıda elə rejissorlar var ki, onları Sumqayıt Dövlət Dram Teatrına dəvət etmək lazımdır. Onlar da gəlib tamaşalar qoysunlar. Aktyorlar da fərqli-fərqli tamaşalarda özlərini göstərə bilsinlər.
- Teatrlara maraq, teatrlarımızın indiki səviyyəsi sizi qane edirmi?
- Teatrımızın indiki səviyyəsinin məni qane etdiyini desəm, yalan demiş olaram. Təbii ki, yox. Qane etmir.
- Teatr aktyorları maaşdan şikayətlənirlər. Nə qədər qazanc əldə edirsiniz?
- Aktyor maaşdan şikayətlənməlidir. 400-450 manat maaş alırlar. Bu maaş bizi qane etmir. Teatrda qazanc yoxdur. Filmə dəvət alanda yenə normal qonorar almaq olur. Aktyorun qazancı sıfırdır.
- Sumqayıt Dövlət Dram Teatrında nə kimi yeniliklər olacaq?
- Böyük mənada yeniliklər sistemlə əlaqəli olan məsələdir. Sistemdə dəyişikliklər olmalıdır. Bizim yeni direktorumuz rejissorlar dəvət edəcək. Festivallar və qastrol səfərlər gözlənilir.
Tamaşaçı sayında qıtlıq yaşanır. Onu üzərində işləyirik ki, biz öz teatrımızda özümüzə aid yeniliklər edə bilək.
- Ümumiyyətlə, ötən teatr mövsümü yaradıcı fəaliyyət baxımından sizin üçün necə oldu?
- Məndə fərqli deyil. Hər il tamaşa təhvil verirəm. Çəkiliş olanda edirəm.
- Seriallara çəkilmisiniz. Onları xatırlayaq. Yeni seriallara dəvət almısınızmı? Qazanc sizi qane edirmi?
- Seriallara dəvət alıb, çəkilirəm. Əvvəlkinə baxanda az da olsa, irəliləyiş var. Burada pul məsələsi problemdir. Pul və ssenari məsələləri həll olunanda digər məsələləri həll edə biləcək rejissorlar var.
- Sizcə, indi film sektorunda vəziyyət nə yerdədir?
- Film sektoru o zaman qane edəcək ki, aktyorlar, ssenaristlər və rejissorlar yaxşı qonorar alacaq. Film sektoru pul istəyir. Bəzi məsələlər yerinə otursa, qane edər. Hazırda bu sektordakı vəziyyət, maliyyə durumu məni qane etmir. Bu sahəni dirçəltmək, inkişaf etdirmək üçün pul lazımdır. Rejissorlar, aktyorlar var. Maliyyə yoxdur.
Nəzrin Vahid
