Sumqayıtda 44 günlük Vətən müharibəsi şəhidinin büstünün və xatirə muzeyinin açılışı olub.
“Report”un məlumatına görə, tədbir Vətən Müharibəsi Qəhrəmanı Anar Şükürovun oxuduğu və adının verildiyi 25 nömrəli məktəbdə keçirilib. Mərasimdə şəhidin ailə üzvləri, şəhər rəsmiləri, hüquq-mühafizə orqanlarının təmsilçiləri, ictimaiyyət nümayəndələri və məktəb kollektivi iştirak ediblər.
Anar Şükürovun məktəbin foyesində ucaldılan büstünün açılışı baş tutub, rəmzi lent kəsilib, daha sonra muzeylə tanışlıq olub. Muzeydə şəhid mayorun uşaqlıq və hərbi xidmətdə olduğu dövrə aid eksponatlar, fotolar, sənədlərin surətləri nümayiş etdirilir.
Qeyd edilib ki, Anar Mehman oğlu Şükürov 1977-ci il yanvarın 20-də Sumqayıtda anadan olub. Azərbaycan Ordusunun mayoru olan Anar Şükürov İkinci Qarabağ müharibəsi zamanı Suqovuşanın azadlığı uğrunda vuruşub. O, 2020-ci il oktyabrın 16-da Ağdərə istiqamətində gedən döyüşlərdə şəhid olub, II Şəhidlər Xiyabanında dəfn edilib.
Prezident İlham Əliyevin müvafiq Sərəncamına əsasən, Anar Şükürova “Vətən Müharibəsi Qəhrəmanı” adı verilib.
