Sumqayıtda bəyəndiyi qızı axtaran gənc polisə verilib. Sumqayıt24 bu haqda 5 dekabr tarixində Qafqazinfo.az-a istinadən xəbər verir.
1-ci Polis Bölməsinə müraciət edən qadın tanımadığı şəxsin onun qapısına nömrə yapışdırdığını və ardıcıl zənglər etdiyini bildirib. Polis hadisəni törədən Saray qəsəbə sakini, 30 yaşlı Qulu Əliyevi (şərti) tutub. O, izahatında bir müddətdir Sumqayıtda sevdiyi qızı axtardığını deyib:
“Bir neçə gün əvvəl Sumqayıtda marşrut avtobusunda bir qız gördüm, ondan çox xoşum gəldi. Həmin qızın dalınca getdim, qızın küçədə bir qadınla görüşdüyünü gördüm. Sonradan qızı gözdən qaçırdım. Həmin ərazidə qızı soraqlamağa başladım və bir nəfər həmin qızın yanında olan qadının əlamətlərinə uyğun gələn şəxsin yaşadığı qapını mənə göstərdi. Həmin qapıya öz mobil nömrəmi yazdım.
Sonradan S.Q. adlı şəxs mənə zəng vurduqda həmin qızı axtardığımı dedim və belə bir əlamətlərə malik qızla tanışlığının olub-olmadığını soruşdum. S.Q. isə mənə həmin qadın olmadığını və belə bir qızı tanımadığını bildirdi. Bundan sonra təxminən yeddi dəfə həmin qadına zəng vuraraq israr etdim ki, mənimlə görüşsün və küçədə qızın yanında gördüyüm həmin qadın olub-olmadığını müəyyən edim. Lakin o, görüşməkdən imtina etdi. Sonradan bildim ki, məndən polisə şikayət edib. Halbuki ona qarşı heç bir nalayiq ifadə işlətməmişəm”.
Şikayətçi qadın isə qapıdakı nömrənin internet ustasına məxsus olduğunu düşünərək zəng etdiyini və həmin qızı tanımadığını bildirib.
Qulu Əliyev barəsində İnzibati Xətalar Məcəlləsinin 510-cu (Xırda xuliqanlıq) maddəsi ilə protokol tərtib edilib. Sumqayıt Şəhər Məhkəməsi onu 50 manat cərimələyərək sərbəst buraxıb.
