26 iyun 1918-ci ildə Azərbaycan Xalq Cümhuriyyətinin fərmanı ilə Azərbaycan Milli Ordusu yaradıldı. Azərbaycanlılardan ibarət olan Müsəlman korpusu - Əlahiddə Azərbaycan korpusu adlandırıldı və Azərbaycan Milli Ordusunun əsası qoyuldu. Həmin il, avqustun 1-də AXC-nin Hərbi Nazirliyi təsis edildi. Qurumun ilk naziri Xosrov bəy Sultanov idi. 25 dekabr 1918-ci ildə isə general Səməd bəy Mehmandarov hərbi nazir, general-leytenant Əliağa Şıxlinski - nazir müavini təyin edildilər.
Azərbaycan Milli ordusunun ilk hərbi birləşmələri xalq könüllü dəstələri ilə birlikdə Qafqaz İslam Ordusunun tərkibində bolşevik-daşnak hərbi qüvvələrinə qarşı döyüşlərdə iştirak edib. Həmçinin Azərbaycan ordusu Bakını azad etmiş, Qarabağda, Lənkəranda daşnak-bolşevik hərbi birləşmələrinin Azərbaycan xalqına qarşı həyata keçirdikləri soyqırımların qarşısını almışdır.
1991-ci ildə Azərbaycan Ali Sovetinin qərarı ilə 9 oktyabr - Azərbaycan Respublikası Silahlı Qüvvələri günü elan edilmişdi. Lakin ulu öndər Heydər Əliyevin 1998-ci il 22 may tarixli fərmanı ilə bu qərar ləğv olunmuşdur və Azərbaycan Respublikası Silahlı Qüvvələri Günü iyunun 26-sı elan olunmuşdur.
İkinci Qarabağ müharibəsində (27.09.2020-10.11.2020) Azərbaycan Silahlı Qüvvələri Qarabağı 30 il davam edən erməni işğalından 44 günə azad etmişdir. Vətən müharibəsində Azərbaycan 2927 şəhid verib.
