19 sentyabr 2023-cü ildə Azərbaycan Ordusunun Qarabağda həyata keçirdiyi lokal xarakterli hərbi tədbirlər 23 saat 43 dəqiqə davam edib. Bundan sonra tam atəşkəs haqqında razılaşma əldə olunub.
Sumqayit24.az xəbər verir ki, Ermənistan ordusu tam tərksilah edilərək ölkədən çıxarıldı, Qarabağda fəaliyyət göstərən qeyri-qanuni rejim ləğv edildi, Azərbaycanın dövlət suverenliyi təmin edildi və nəhayət, Xankəndi, Xocalı, Ağdərə, Xocavənd, Əsgəran kimi bölgələrimizdə də üçrəngli bayrağımız yüksəldi.
19 sentyabr hadisələri zamanı Sumqayıt şəhəri və Ceyranbatan qəsəbəsindən şəhid olan Azərbaycan Ordusunun hərbçilərinin adlarını təqdim edirik:
Ramil Şirinov 8 avqust 1987-ci ildə İmişli rayonunun Bəhrəmtəpə qəsəbəsində anadan olub. Orta təhsilini Sumqayıt şəhər 12 saylı məktəbdə alıb. Gəncə Texnologiya Universitetində ali təhsilə yiyələnib.
Daxili İşlər Nazirliyinin Çevik Polis Alayının polis serjantı olan Ramil 19 sentyabr hadisələri zamanı Xocavənd rayonunda şəhid olub.
Sumqayıt Şəhidlər Xiyabanında dəfn edilib. Ailəli idi. İki övladı yadigar qalıb.
Asim Camalzadə 5 fevral 1994-cü ildə Sumqayıt şəhərində anadan olub. Sumqayıt şəhər 16 saylı məktəbdə təhsil alıb.
Daxili İşlər Nazirliyinin Çevik Polis Alayının çavuşu olan Asim 19 sentyabr hadisələri zamanı Xocavənd rayonunda şəhid olub.
O, Sumqayıt Şəhidlər Xiyabanında torpağa tapşırılıb.
Zamin Abbasov 8 mart 1993-cü ildə Qubadlı rayonunda anadan olub. Atası Xəqani Abbasov I Qarabağ Müharibəsi veteranıdır. Orta təhsilini Sumqayıt şəhər 24 saylı məktəbdə alıb. Heydər Əliyev adına Azərbaycan Ali Hərbi məktəbində ali hərbi təhsilə yiyələnib.
Azərbaycan Silahlı Qüvvələrinin baş leytenantı olan Zamin 19 sentyabr hadisələri zamanı Xocavənd rayonunda şəhid olub.
Sumqayıt Şəhidlər Xiyabanında dəfn edilib. Ailəli idi. Bir övladı yadigar qalıb.
Ramil Rəhimov 1 yanvar 1992-ci ildə Ceyranbatan qəsəbəsində anadan olub. Ceyranbatan qəsəbə 1 saylı məktəbi bitirib.
Azərbaycan Silahlı Qüvvələrinin giziri olan Ramil 19 sentyabr hadisələri zamanı Ağdərə rayonunda şəhid olub. II Şəhidlər Xiyabanında dəfn edilib. Ailəli idi. Bir övladı yadigar qalıb.
Cavid Mirzəyev 14 noyabr 1994-cü ildə Siyəzən rayonunun Gilçay qəsəbəsində anadan olub. Orta təhsilini Sumqayıt şəhəri 1 saylı məktəbdə alıb. Bakı Slavyan Universitetində ali təhsilə yiyələnib.
Azərbaycan Silahlı Qüvvələrinin baş leytenantı olan Cavid 19 sentyabr hadisələri zamanı Xocavənd rayonunda şəhid olub. Sumqayıt Şəhidlər Xiyabanında dəfn edilib. Ailəli idi. Bir övladı yadigar qalıb.
