Sumqayıt çimərliyində özbaşınalıq halı qeydə alınıb. Bu haqda 10 iyul tarixində Sumqayıt24 Oxu.az-a istinadən məlumat verir.
Aidiyyəti qurumlar tərəfindən bəzi çimərliklərə giriş qadağan edilib. “Lotus” çimərlik ərazisində isə "Çimmək qadağandır" lövhəsinin üstü qəsdən qara sellofan paketlə örtülüb. Nəticədə ərazidə istirahət edən vətəndaşlar çimməyin qadağan olduğundan xəbərsiz qalırlar. Obyekt sahibi isə cavabında: “Dəniz bizimdir, bizə belə tapşırıq verilib”, – deyə bildirib.
Məsələ ilə bağlı Fövqəladə Hallar Nazirliyindən (FHN) bildirilib ki, sözügedən lövhə qurumun aidiyyəti xidməti tərəfindən quraşdırılmayıb.
Sumqayıt Şəhər İcra Hakimiyyətindən isə bildirilib ki, əraziyə baxış keçirilib:
"Baxış zamanı ərazidə "çimmək qadağandır" elanına rast gəlinməyib. Araşdırma zamanı müəyyən edilib ki, müvafiq qurum tərəfindən ərazidə çimərlik fəaliyyəti göstərilməsinə icazə verilib. Xilasedici mövcuddur və sahibkar çimərlik operatoru kimi fəaliyyət göstərir".
