Bu gün Azərbaycanın Milli Qəhrəmanı, telereportyor Çingiz Mustafayevin doğum günüdür.
Çingiz Mustafayev 29 avqust 1960-cı ildə Rusiyanın Həştərxan vilayətində, hərbçi ailəsində anadan olub.
O, 4 yaşında ailəsi ilə birgə Bakıya köçüb. Atası Çingizin hərbçi olmasını istəyir və bu səbəbdən oğlunu Cəmşid Naxçıvanski adına hərbi liseydə oxumağa yollayır.
Mustafayev burada onuncu sinfə qədər təhsil alır, sonra isə hərbi məktəbi yarımçıq qoyur, 167 saylı məktəbdə təhsilini davam etdirir. O, 1983-cü ildə Azərbaycan Tibb Universitetini bitirir. Lakin bir müddət sonra Mustafayev jurnalistika sahəsinə üz tutur.
O, jurnalistika karyerasına 20 yanvar 1990-cı ildə sovet ordusunun Bakıda mülki əhaliyə qarşı törətdiklərini lentə alaraq başlayır. Sonra isə Çingiz Mustafayev özunu hərbi jurnalistikaya həsr edir. 1991-ci ildən o, Azərbaycan Dövlət Televiziyasında reportyor kimi fəaliyyət göstərir.
Çingiz kiçik heyəti ilə birlikdə cəbhə bölgələrinə səfərlər edir, buradakı real vəziyyət barədə məlumatlar yayırdı. O, Qarabağ müharibəsi haqqında 8 ay ərzində 18 sənədli film hazırlayır. Məhz bu video və fotomateriallar sayəsində dünya Qarabağ münaqişəsinin həqiqi xarakterini öyrənir və Ermənistan qüvvələrinin dinc əhaliyə qarşı törətdiklərindən xəbər tutur.
Media nümayəndəsinin hərbi jurnalistika karyerasında ən böyük xidmətlərindən biri Xocalı soyqırımını lentə alması olur. O, bu qətliamı çəkmək üçün bir qrup jurnalistlə birgə helikopterlərlə iki dəfə Xocalıya səfər edir. Çingiz burada yüzlərlə cəsədi lentə alır.
Çingiz Mustafayev 15 iyun 1992-ci ildə Xocalı rayonunun Naxçıvanlı kəndində hərbi əməliyyatların çəkilişi zamanı aldığı mərmi qəlpəsindən həlak olub. O, Bakıda, Şəhidlər xiyabanında dəfn olunub. 6 noyabr 1992-ci ildə Çingiz Mustafayev “Azərbaycanın Milli Qəhrəmanı” adına layiq görülüb.
