Çin Beynəlxalq İqtisadi Əməkdaşlıq Assosiasiyasının nümayəndəsi Van Veyveyin rəhbərlik etdiyi nümayəndə heyəti Sumqayıtda olub. Sumqayıt24 bu haqda 23 noyabr tarixində xəbər verir.
Nümayəndə heyəti ilə İqtisadi Zonaların İnkişafı Agentliyinin rəhbərliyi arasında Sumqayıt Kimya Sənaye Parkında görüş keçirilib. Qonaqlara qurumun idarəçiliyində olan sənaye parkları, sahibkarlar üçün yaradılmış əlverişli biznes imkanlarından bəhs olunub. Sonra agentliyin təqdimatı nümayiş etdirilib.
Tərəflər arasında iqtisadiyyat və sənayenin müxtəlif sahələrində əməkdaşlığın qurulması, birgə layihələrin həyata keçirilməsi imkanları müzakirə olunub. Çin şirkətləri sənaye zonalarında, xüsusilə də işğaldan azad edilmiş ərazilərdə yaradılan sənaye parklarında mövcud əlverişli investisiya imkanlarından yararlanmağa dəvət edilib.
Sonda qonaqlar Sumqayıt Kimya Sənaye Parkında görülmüş işlərlə, rezidentlər “Azərbaycan Vanhong Ceramics Co.” MMC-nin Keramik plitələr və “SOCAR Polymer” MMC-nin polipropilen (PP) və yüksək sıxlıqlı polietilen (YSPE) istehsalı müəssisələrinin fəaliyyətləri ilə tanış olublar.
