Bu gün şəhid Elnur Abdullayevin mövlud günüdür.
Elnur Təvəkkül oğlu Abdullayev 1983-cü il iyul ayının 10-da Sumqayıt şəhərində anadan olub. 2011-ci ildə tank-mexanik sürücülük kursunu bitirdikdən sonra hərbi qulluqçu kimi ordu sıralarında xidməti vəzifəsini yerinə yetirməyə başlayıb.
Vətən müharibəsi başladığı gündən Abdullayev Füzuli və Xocavənd rayonları istiqamətlərində döyüşüb. O, döyüşlər zamanı düşmənin 9 tankını qənimət olaraq ələ keçirib. Döyüşlərin birində idarə etdiyi tankın vurulmasından son anda xilas olunsa da, oktyabr ayının 27-də Xocavənd istiqamətində gedən döyüşlərdə şəhidlik zirvəsinə ucalıb. Sumqayıtın Şəhidlər xiyabanında dəfn edilib.
Abdullayev xidməti müddətində “Azərbaycan Respublikası Silahlı Qüvvələrinin 95 illiyi” və “Azərbaycan Ordusunun 100 illiyi” yubiley medalları, “Qüsursuz xidmətə görə” 3-cü dərəcəli medal və fəxri fərmanlarla, şəhidlik zirvəsinə ucaldıqdan sonra isə “Xocavəndin azad olunmasına görə”, “Cəbrayılın azad olunmasına görə”, “Füzulinin azad olunmasına görə” və “Vətən uğrunda” medalları ilə təltif olunub.
