Sumqayıt Dövlət Universitetinin rektor müşaviri vəzifəsinə təyinat olub. Sumqaylt24 bu haqda 6 dekabr tarixində xəbər verir.
Sözügedən vəzifə M.V. Lomonosov adına Moskva Dövlət Universitetinin 2006-cı il məzunu, k.ü.e.d., dosent İsmayıl İsmayılova həvalə edilib. O, əmək fəaliyyətinə Moskvada kimyaçı-mütəxəssis olaraq başlayıb, daha sonra Yusif Məmmədəliyev adına Neft-Kimya Prosesləri İnstitutunda aparıcı elmi işçi, Baş texnoloq, Baş elmi işçi vəzifələrində çalışıb.
Dövlət xətti ilə M.V. Lomonosov adına Moskva Dövlət Universitetinin Kimya fakültəsində və akademik Y.H. Məmmədəliyev adına Neft-Kimya Prosesləri İnstitutunda yerinə yetirdiyi “Ekoloji əlverişli xammallar əsasında korroziyaya qarşı çoxfunksiyalı, biosid aktivliyinə malik yeni reagentlərin yaradılması” mövzusunda dissertasiya işini Neft kimyası və Kimya texnologiyası və mühəndisliyi ixtisasları qovşağında 2017-ci ildə, 32 yaşında müdafiə edib, kimya üzrə elmlər doktoru elmi dərəcəsinə layiq görülüb.
İsmayılov elmi fəaliyyətini akademik Y.H. Məmmədəliyev adına Neft-Kimya Prosesləri İnstitutunda davam etdirir. Ümumilikdə 110-dan çox elmi əsərin, o cümlədən 3 patentin və 1 monoqrafiyanın müəllifidir. Əsərlərin 40-dan çoxu dünyanın nüfuzlu elmi jurnallarında yer alıb.
