Fövqəladə Hallar Nazirliyinin Sumqayıt Regional Mərkəzi tərəfindən müşavirə keçirilib. Sumqayıt24 bu haqda 6 dekabr tarixində xəbər verir.
Abşeron Rayon İcra Hakimiyyətində baş tutan tədbir rayon ərazisində mülki müdafiənin vəziyyəti ilə bağlı olub. Müşavirədə FHN Sumqayıt Regional Mərkəzi, Abşeron Rayon Yanğından Mühafizə Hissəsi, Abşeron Rayon İcra Hakimiyyəti və yerli özünüidarəetmə orqanlarının nümayəndələri, aidiyyəti rayon xidmətləri və təhsil müəssisələrinin, mənzil-kommunal təsərrüfatı təşkilatlarının rəhbərləri iştirak ediblər.
İcra Hakimiyyəti başçısının birinci müavini Yusif Sadıqov tədbirin əhəmiyyətindən danışıb, mülki müdafiə sahəsində birgə fəaliyyətin vacibliyini vurğulayıb. Sonra Sumqayıt Regional Mərkəzinin rəisi polkovnik Vaqif Fətullayev rayon ərazisində mülki müdafiə sahəsində mövcud vəziyyət və problemlər, onların həlli yollarından söz açıb.
Çıxış edən natiqlər mülki müdafiə sahəsində görülmüş işlər barədə ətraflı danışıblar. Həmçinin Sumqayıt Regional Mərkəzinin əməkdaşları rayon ərazisində yerləşən mülki müdafiə obyektlərinin vəziyyəti haqqında iştirakçıları məlumatlandırıblar.
Sonda mövzu ilə bağlı müzakirələr aparılıb, suallar cavablandırılıb.
