Bu gün Vətən müharibəsi şəhidi Vüqar Məmmədovun doğum günüdür.
Vüqar İlqar oğlu Məmmədov 9 yanvar 1994-cü ildə Sumqayıt şəhərində anadan olub.
Məmmədov orta təhsilini 22 nömrəli tam orta məktəbdə alıb. Ali təhsilini 2011-2015-ci illərdə Bakı Dövlət Universitetinin İlahiyyat fakültəsində alıb.
2015-ci ildə Azərbaycan Silahlı Qüvvələri Quru Qoşunları sıralarında həqiqi hərbi xidmətə başlayan Vüqar Məmmədovun xidməti müddətində Aprel döyüşləri baş verib.
Əsgər Məmmədov münaqişənin ilk günlərindən etibarən döyüşlərdə iştirak edib. Hərbi xidmətdə topçu vəzifəsində və manqa komandiri kimi xidmət edib.
2020-ci ilin 27 sentyabrında başlanan Vətən müharibəsi zamanı könüllü olaraq Füzuli rayonu istiqamətindəki döyüşlərə yollanıb.
Vüqar oktyabrın 6-da Füzuli şəhər mərkəzinin azad edilməsi uğrunda aparılan şiddətli döyüşlər zamanı düşmən snayperinin açdığı atəş nəticəsində şəhid olub.
Məmmədov ölümündən sonra "Vətən uğrunda" medalı ilə təltif edilib.
