Kəlbəcərin işğaldan azad edilməsindən 5 il keçir.
Sumqayit24.az xəbər verir ki, Ermənistanın 2020-ci il 27 sentyabrda başladığı təcavüzə cavab olaraq Azərbaycan Ordusunun əks-hücum əməliyyatı Zəfərlə nəticələnib.
44 günlük Vətən müharibəsi zamanı Azərbaycan Ordusu 300-dən çox yaşayış məntəqəsini, eləcə də Ağdərə, Murovdağ və Zəngilan istiqamətlərində mühüm strateji yüksəklikləri işğaldan azad edib.
8 noyabrda Şuşanın geri alınmasından sonra Ermənistan məğlubiyyətini qəbul edərək kapitulyasiyaya imza atmağa məcbur olub.
Noyabrın 10-da Azərbaycan Prezidenti İlham Əliyev, Rusiya Prezidenti Vladimir Putin və Ermənistanın Baş naziri Nikol Paşinyan arasında Bəyanat imzalanıb.
Həmin sənədin 6-cı bəndinə əsasən, Kəlbəcər rayonu Azərbaycana qaytarılıb. Bəyanata görə, rayon 15 noyabra qədər boşaldılmalı idi, lakin ermənilər Rusiya vasitəsilə əlavə 10 gün möhlət istəyib. Azərbaycan humanistlik göstərərək bu tələbi qəbul edib və ermənilərə əlavə vaxt verilib. 25 noyabr 2020-ci ildə Kəlbəcər rəsmən Azərbaycana təhvil verilib.
Beləliklə, Kəlbəcərin 27 illik işğalına son qoyulub.
Lakin verilən əlavə 10 gün ərzində də ermənilər rayonun müxtəlif ərazilərində dağıntılar törədib, yaşayış evlərini, tikililəri yandırıb, talayıb, ağacları məhv edərək ekoloji zərər vurublar. Bundan başqa, Kəlbəcərin yollarında və yaşayış zonalarında piyada və tank əleyhinə böyük miqdarda minalar basdırıblar. Məhz bu minalardan biri 2021-ci il 4 iyunda Susuzluq kəndi ərazisində jurnalistləri daşıyan nəqliyyat vasitəsinin partlamasına səbəb olub. Hadisədə "Azərtac"ın müxbiri Məhərrəm İbrahimov, AzTV-nin operatoru Sirac Abışov və Kəlbəcər RİH nümayəndəsinin müavini Arif Əliyev həlak olub, 4 nəfər isə yaralanıb.
Xatırladaq ki, üçtərəfli Bəyanatın 2-ci bəndinə əsasən Ağdam rayonu 20 noyabrda, 6-cı bəndinə əsasən isə Laçın rayonu 1 dekabrda Azərbaycana qaytarılıb.
Azərbaycan Ağdam, Kəlbəcər və Laçının geri alınmasına bir nəfər də itki vermədən nail olub.
Prezident İlham Əliyev 25 noyabr 2020-ci ildə xalqa müraciət edərək Kəlbəcərin işğaldan azad olunmasını böyük qürurla elan edib.
Kəlbəcərin azad edilməsinə görə Azərbaycan Respublikasında xüsusi medal təsis olunub və bu əməliyyatda igidlik göstərən hərbçilər həmin medalla təltif ediliblər.
Prezidentin Sərəncamına əsasən, 25 noyabr "Kəlbəcər şəhəri günü" kimi qeyd olunur.
Qeyd edək ki, Kəlbəcər rayonu 1993-cü il aprelin 2-də Ermənistan Silahlı Qüvvələri tərəfindən işğal edilmiş və 27 il ərzində rayon tamamilə dağıdılıb, tarixi-mədəni abidələr və qəbiristanlıqlar məqsədli şəkildə məhv edilib.
