Xəbər verdiyimiz kimi, bu gün paytaxtın Binəqədi rayonunda yerləşən "İdrak" liseyində 10-cu sinif şagirdi müəllimini güllələyib.
Sözügedən məktəbin valideyni olan Əməkdar artist Aqşin Abdullayev hadisə ilə bağlı Azxeber.com-a danışıb. Sənətçi əvvəlcə yayılan xəbərlərin şayiə olduğunu düşünüb, lakin sonradan eşitdiklərinin onu ciddi şəkildə narahat etdiyi bildirib:
"Mənim qızım həmin məktəbdə 5-ci sinifdə oxuyur. Səhər kiçik qızım məni yuxudan oyadaraq sosial şəbəkələrdə yayılan xəbərləri göstərdi. Təcili məktəbə getdim. Məktəbə daxil olanda direktorla rastlaşdım və o, mənə narahat olmağa əsas olmadığını, yayılan xəbərlərin şayiə olduğunu dedi. Daha sonra mühafizəçi ilə danışdım, o da hadisəni təkzib etdi. Ardınca bir müəllimlə söhbət etdim və hadisənin təfərrüatlarını öyrəndim. Müəllim təsdiqlədi ki, şagird tənəffüs zamanı özü ilə gətirdiyi silahla müəlliminə atəş açıb. Xoşbəxtlikdən övladım bu hadisənin şahidi olmayıb".
Əməkdar artist qeyd edib ki, uşaqlarda bu kimi psixoloji halların yaranmasında internet oyunlarının da rolu ola bilər:
"Mən başa düşə bilmirəm ki, uşaqlarda bu psixologiya haradan yaranır? Onlar buna necə cürət edirlər? Ola bilsin ki, oynadıqları oyunların təsiri var. Bu cür hadisələr artıq bütün dünyada baş verirsə, demək ki, təhlükəli bir mərhələyə çatmışıq. Düşünmürəm ki, şagird bunu müəlliminə qarşı şəxsi ədavətə görə edib".
Sənətçi hadisədə adı hallanan məktəbin təhlükəsizlik sistemi ilə bağlı da fikirlərini bölüşüb:
"Mən belə qənaətə gəlmişəm ki, məktəbin təhlükəsizlik sistemi zəifdir. Orada mühafizə var, amma biz uşağı qapıdan məktəbə ötürürük və yenə qapıdan götürürük. Valideynlərin içəri daxil olmasına icazə verilmir. Deməli, sadəcə mühafizə kifayət deyil, daha ciddi turniket və yoxlama sistemləri qurulmalıdır. Heç bir uşaq çantasında silahla rahat şəkildə məktəbə daxil olmamalıdır. Əgər daxil ola bilibsə, demək ki, təhlükəsizlik zəifdir".
Əməkdar artist məktəblə bağlı yekun qərarını hələ vermədiyini də bildirib:
"Övladımın bu məktəbdə təhsilini davam etdirib-etdirməyəcəyimə hələ qərar verməmişəm. Problem ondadır ki, demək olar, heç bir məktəbdə yüksək səviyyəli təhlükəsizlik tədbirləri yoxdur. Başqa harada oxudaq? Yekunda lisey rəhbərliyinin valideynlərə hansı açıqlama verəcəyini gözləyəcəyik".
Qeyd edək ki, güllə atan şagirdin atası Samir Şirinov əvvələr Sumqayıt Şəhər İcra Hakimiyyətinin Mənzil Kommunal Təsərrüfat Birliyində rəis müavini vəzifəsində işləyib, hazırda işsizdir.
