Sumqayıtda körpənin ölüm səbəbi açıqlanıb. Sumqayıt24 bu haqda 27 noyabr tarixində Report.az-a istinadən xəbər verir.
Aprelin 20-də Perinatal Mərkəzdə 33 yaşlı Aygün Kərimova qeysəriyyə əməliyyatı ilə oğlan uşağı dünyaya gətirib. Körpəyə yenidoğulmuşlarda hipoksik işemik ensefalopatiya, yenidoğulmuşlarda serebral iflic diaqnozu qoyulub. Ona protokol üzrə yardımlar göstərilib, müalicə və müayinə aparılıb.
Uşağın anası 27 aprel tarixində ərizə yazaraq ondan imtina edib. Tibb müəssisəsi bununla bağlı aidiyyəti qurumları məlumatlandırıb.
Körpənin müalicəsi Reanimasiya şöbəsində davam etdirilib. Azyaşlı iyunun 16-da Uşaq Xəstəxanasının Pediatriya şöbəsinə köçürülüb. Tibbi personal onu daim diqqət mərkəzində saxlayıb, lazımi prosedurlar həyata keçirilib.
Bütün müalicə tədbirlərinə baxmayaraq, azyaşlı 24 noyabr saat 00:40 radələrində dəqiqləşdirilməmiş uşaq serebral iflici, ensefalopatiya, dəqiqləşdirilməmiş pnevmoniya və zülal enerji çatışmazlığı səbəbindən vəfat edib.
Qeyd edək ki, körpənin uşaq evinə yerləşdirilməsinə xəstəliklə əlaqədar imtina cavabı verilmişdi.
Onun nəşi təşrih üçün aidiyyəti üzrə təhvil verilib.
