Bu gün Sumqayıt Şəhər Məhkəməsində hakim Fərid Nəsimiyevin sədrliyi ilə qəsdən sağlamlığa az ağır zərər vurma, adam oğurluğu və əzab verməkdə təqsirləndirilən "Qurtuluş" Reabilitasiya Mərkəzinin rəhbəri Ceyhun Salmanov və mərkəzin daha iki əməkdaşının cinayət işi üzrə məhkəmə iclası keçirilib.
Lent.az-ın məlumatına görə, prosesdə ittiham aktı oxunub. Təqsirləndirilən şəxslər onlara qarşı irəli sürülən ittiham üzrə özlərini qismən təqsirli bildiklərini deyiblər.
Ceyhun Salmanov ifadəsində bildirib ki, müalicə alan şəxslərin mərkəzdə saxlanılması müalicə prosesidir. Mərkəzdə onlarla ancaq profilaktik söhbətlər aparılır.
Növbəti proses 17 iyuna təyin olunub.
Xatırladaq ki, "Qurtuluş Reabilitasiya Mərkəzi" MMC-nin Sumqayıtdakı müəssisəsində baş vermiş qanunsuzluqlarla bağlı şəhər prokurorluğunda cinayət işi başlanıb və istintaq aparılıb.
İstintaq zamanı müəssisənin direktoru Ceyhun Salmanovun Elşad Məhərrəmov, Natiq Əliyev və digər şəxslərlə əlbir olaraq 7-dən çox şəxsi zor və aldatma yolu ilə Corat qəsəbəsində yerləşən müəssisəyə gətirib qanunsuz saxlaması, onları yaxınları ilə əlaqədən məhrum etməsi, fiziki və psixi əzab verməsi, bəzi şəxslərin sağlamlığına xəsarət yetirməsinə dair əsaslı şübhələr müəyyən edilib.
Toplanmış sübutlar əsasında adıçəkilən şəxslər Cinayət Məcəlləsinin 145.2.1 və 145.2.4-cü maddələri ilə təqsirləndirilərək barələrində həbs qətimkan tədbiri seçilib. Apreldə həbs müddəti daha iki ay uzadılıb. Digər iştirakçıların müəyyənləşdirilməsi istiqamətində istintaq davam edir.
