Bu gün şəhid jurnalist Sirac Abışovun mövlud günüdür.
Sirac Abış oğlu Abışov 1989-cu ildə Qubadlı şəhərində anadan olub. Abışov Birinci Qarabağ müharibəsi zamanı ailəsi ilə birlikdə evlərindən didərgin düşüb, Sumqayıt şəhərində yaşamağa başlayıb. 1996-2007-ci illərdə 40 nömrəli məktəbdə təhsil alıb. Daha sonra Azərbaycan Dəniz Balıq Sənayesi Texnikumuna daxil olub, 2009-cu ildə Gömrük ekspertizası ixtisası üzrə tam kursu bitirib.
Media sahəsinə olan marağı onun yolunu Azərbaycan Dövlət Televiziyası və Radiosu Qapalı Səhmdar Cəmiyyətindən salıb. O, 2019-cu ildən AzTV-də işləməyə başlayıb.
Bir müddət “Yurd TV”də, 2020-ci ilin noyabr ayından isə Xüsusi Çəkiliş Qrupunun tərkibində ordumuzun nəzarətinə keçən Ağdam, Füzuli, Cəbrayıl, Zəngilan, Qubadlı, Hadrut, Xocalı və Xocavənd rayonlarının bütün ərazilərində dövlət əhəmiyyətli çəkilişlər edib.
Sirac 4 iyun 2021-ci ildə Kəlbəcər rayonu ərazisində yerləşən Susuzluq kəndi yaxınlığında baş verən partlayış zamanı şəhid olub.
Prezident İlham Əliyevin Sərəncamı ilə şəhid jurnalist Sirac Abışov 3-cü dərəcəli “Vətənə xidmətə görə” ordeni ilə təltif edilib.
