Antiterror tədbirləri zamanı şəhid olan gizir Ramil Rəhimovun qızı dünyaya gəlib. Bu haqda məlumatı Sumqayıt24 bu gün, 3 yanvar tarixində verir.
Onun qızı atasının doğum günündə, yəni 1 yanvar tarixində anadan olub. Ananın sözlərinə görə, qızının adını məhz şəhidimizin özü qoyub:
“Adını böyük qızımızın adına uyğun qoyub. Böyük qızımızın adını Dəniz, bu qızımızın adını isə Yağmur qoyub”.
Qeyd edək ki, Rəhimov Ramil Sücəddin oğlu 1 yanvar 1992-ci ildə Abşeron rayonunun Ceyranbatan qəsəbəsində anadan olub. Ceyranbatan qəsəbə 1 saylı orta məktəbini bitirib. Orta məktəbi bitirdikdən sonra Azərbaycan Silahlı Qüvvələrinin sıralarında hərbi xidmətdə olub. Hərbi xidmətini tamamladıqdan sonra Təlim-Tədris Mərkəzində gizir hazırlığı kurslarında iştirak edib. Azərbaycan Silahlı Qüvvələrinin giziri olan Rəhimov Ramil Sücəddin oğlu Azərbaycan Respublikasının Silahlı Qüvvələri tərəfindən 20 sentyabr 2023-cü il tarixində həyata keçirilmiş uğurlu lokal antiterror tədbirləri zamanı şəhid olub. II Şəhidlər xiyabanında dəfn edilib.
