Sumqayıt Dövlət Universitetində “Azərbaycan Universitetlərində yaşıl və davamlı qlobal iqtisadi təkmilləşdirmə: bərpa olunan enerji və iqlim dəyişikliyinin azaldılması – REFRESH” layihəsinin məlumat günü keçirilib. Sumqayıt24 bu haqda 22 noyabr tarixində xəbər verir.
Avropa Birliyinin Erasmus fondu tərəfindən maliyyələşdirilən layihənin məqsədi ölkəmizdə bərpa olunan enerji sahəsində maarifləndirməni artırmaq, yaşıl enerjiyə keçid dövrünü yaxşılaşdırmaq, tədris metodologiyalarını, kurs proqramlarını təkmilləşdirmək və hər bir tərəfdaş ali təhsil müəssisəsində pilot kurslara başlamaq üçün Təlimçilərin Təlimi (ToT) proqramına müəllim heyətini cəlb etmək, bununla da ali təhsil ocağında müvafiq sahə üzrə mövcud potensialı artırmaqdır.
Layihənin koordinatoru Azərbaycan Dövlət İqtisad Universitetidir. 4 Avropa universiteti (İspaniyanın Barselona Universiteti, İtaliyanın Bolonya Universiteti, Danimarka Texniki Universiteti, İsveçin Kral Texnologiya İnstitutu) və 6 yerli universitet (Sumqayıt Dövlət Universiteti, Gəncə Dövlət Universiteti, Mingəçevir Dövlət Universiteti, Lənkəran Dövlət Universiteti, Azərbaycan Texnologiya Universiteti) tərəfdaş qismində çıxış edir.
Fizika və elektroenergetika fakültəsinin Elektromexanika kafedrasının müdiri dosent Turqay Hüseynov “REFRESH” proqramının ilk təlimlərinə qatılmaq üçün 3-9 dekabr tarixlərində İtaliyanın Bolonya şəhərinə ezam olunacaq.
Qeyd edək ki, interaktiv formada keçən tədbir sual-cavabla yekunlaşıb.
