Sumqayıtda yaşayış massivinin sakinləri binalarda baş vermiş oğurluq hadisələri ilə bağlı şikayətçidirlər. Bu haqda 14 fevral tarixində Sumqayıt24 Bakupost.az-a istinadən məlumat verir.
“Stansiya Sumqayıt”ın sakinləri bildirirlər ki, binanın qapıları, kamera sistemləri, kombilər və s. oğurlanıb:
“Yaşadığımız ərazi, bu binalar dövlət tərəfindən şəhid ailələri, qazilər, imtiyazlı şəxslər üçün tikilən binalardır. Demək olar ki, hər binadan oğurluq olub. Məsələn bir binada 20 mənzili uşaq evi sakinlərinə veriblər. Ailə başçısı səhərdən axşama qədər işdə olur. Bəziləri isə Qarabağda işləməyə gediblər, evdə ailələri, həyat yoldaşları, uşaqları tək qalırlar. Onlar da qorxurlar. Sanki oraya gələn oğrular da bilirlər ki, orada qalanların yoldaşları evdə yoxdur. Binanın qapılarını söküblər, zirzəmidə liftə aid kabellər var idi, onları da kəsib aparıblar. 28 binada, demək olar ki, bütün kombiləri söküb aparıblar”.
Qeyd edilib ki, əvvəllər kameralar quraşdırılsa da, onları da söküb aparıblar.
“Polisə, İcra Hakmiyyətinə müraciət olunub, amma nəticə yoxdur. Bizim qaldığımız binanın liftini söküblər, 9-cu mərtəbədə qalırıq. Körpə uşaqlarla piyada düşüb qalxıram. Şübhələndiyimiz şəxslər var, amma o səlahiyyətdə deyilik ki, onları tutaq. Daha əvvəl 1-2 adam saxlamışdılar, amma buraxdılar”, – deyə sakin əlavə edib.
