"Ümid edirik ki, oyun günü anşlaq olacaq".
Bunu Offsideplus.az-a açıqlamasında "Sumqayıt" futbol klubunun mətbuat katibi Zaur Xudiyev deyib.
O bildirib ki, Premyer Liqanın 12-ci turunda baş tutacaq "Sumqayıt" - "Qarabağ" qarşılaşmasına azarkeşlər tərəfindən böyük maraq var:
"Azarkeşləri tələsməyə çağırıram. Artıq üç-beş manatlıq biletlər tükənmək üzrədir. Daha çox qapı arxasında yerləşən sıralara 2 manatlıq biletlər qalıb. Bütün azarkeşlərimizi stadiona gözləyirik. Yaxşı olar ki, oyun gününə qədər biletləri alsınlar ki, matç günü kassanın qarşısında növbədə gözləməli olmasınlar.
Xudiyev qeyd edib ki, artıq 4000 bilet satılıb:
"Stadionunun tutumu isə 9000 civarıdır. Hazırda bilet satışlarımız davam edir.
Qarşılaşmanın biletlərini Mehdi Hüseynzadə adına stadionun yaxınlığına yerləşən satış məntəqələrindən, həmçinin iTicket.az və 1 saylı Sumqayıt ASAN Xidmət mərkəzindən əldə edə bilərsiniz".
Qeyd edək ki, qarşılaşma 21 noyabr saat 19:00-da Mehdi Hüseynzadə adına stadionda keçiriləcək.
