H.Z. Tağıyev qəsəbəsində təcili tibbi yardım xidmətinin vəziyyəti ilə bağlı açıqlama verilib. Sumqayıt24 bu haqda 4 yanvar tarixində xəbər verir.
Xəbər verdiyimiz kimi, sakinlər həkim və ambulansların sayının az olmasından şikayətlənirlər. Onların sözlərinə görə, qəsəbədə 20 mindən çox əhali yaşayır. Səhiyyə ocağında isə cəmi 2 təcili tibbi yardım avtomobili mövcuddur.
Sumqayıt Tibb Mərkəzinin İctimaiyyətlə əlaqələr bölməsinin müdiri Ramil Zeynallı məsələyə aydınlıq gətirib:
“Hər 10 min əhaliyə, əsasnaməyə əsasən, bir briqada nəzərdə tutulub. H.Z. Tağıyev qəsəbəsində isə 2 briqada fəaliyyət göstərir. Qeyri-iş günlərində çağırışların sayının artması iş yükünün yüksəlməsinə səbəb olub. Buna baxmayaraq, təcili yardım briqadaları əhaliyə yüksək keyfiyyətli tibbi xidmətin göstərilməsi üçün çağırışların vaxtında yerinə yetirilməsinə çalışır. Təcili tibbi yardım stansiyasının işinin təkmilləşdirilməsi istiqamətində müvafiq tədbirlər həyata keçirilir və bundan sonra da lazımi addımlar atılacaq. Avtoparkda olan avtomobillər də tədricən yenilənəcək”.
