Sumqayıta köçənlərin sayı artır. Sumqayıt24 bu haqda 4 dekabr tarixində ATV-yə istinadən xəbər verir.
Səbəblərdən biri isə Bakıda həm boş torpaq sahələrinin, həm də tikililərin bahalaşmasıdır. Əmlak bazarı üzrə ekspert Ramil Qasımzadənin sözlərinə görə, “xruşovka” layihəli binalarda mənzillərin qiyməti paytaxtda 80-100 min aralığındadırsa, Sumqayıtda bu rəqəm 40-50 min manatdır:
“İki otaqlılar Sumqayıt şəhərində təxminən 55-70 min manat arasında, üç otaqlılar 75-85 min arasında, dörd otaqlılar isə 90-120 min arasındadır”.
Yeni tikilən hündürmərtəbəli binalarda isə qiymətlər bir kvadratmetrə görə 600-1200 manat arasında dəyişir. Şəhərin mərkəzində, eləcə də dəniz kənarında evlər daha bahadır: 1 kv.m 1000 manatdan başlayır. Ekspert deyir ki, Sumqayıtda yaxın aylarda qiymətlərdə dəyişiklik gözlənilmir:
“Bakı şəhərində mənzil tapa bilməyən vətəndaşların, demək olar ki, əksəriyyəti Sumqayıt daşınmaz əmlak bazarlarına müraciət edir, oradan mənzil almağa çalışır. Son illərdə Sumqayıtda qiymətlərdə artım olub. Təxminən 15-20% aralığında dəyişir. Paytaxtda qiymət artdıqca bu, təbii olaraq yaxınlıqdaki şəhərlərə də təsir göstərir.”
