2026-2027-ci tədris ili üzrə Sumqayıtda fəaliyyət göstərən gimnaziya və liseylərin 7-ci sinfinə qəbul prosesi başlayır. Şagird qəbulu mərkəzləşdirilmiş imtahan əsasında həyata keçiriləcək.
Qeydiyyatdan keçmək üçün valideynlər (və ya qanuni nümayəndələr) 9-19 iyun tarixlərində şəxsi kabinetlərində "Sorğu yerləşdir" bölməsinə daxil olaraq öncə "Mərkəzi imtahanla qəbul" düyməsini, sonra isə imtahan keçiriləcək mərkəzi və müvafiq məlumatları seçməlidirlər.
Qeyd edək ki, lisey və gimnaziyalara qəbul ildə bir dəfə – tədris ili başlamazdan əvvəl "Şagirdlərin elektron yerdəyişməsi" (sy.edu.az) sistemi vasitəsilə qeydiyyatdan keçmiş və imtahanda iştirak hüququ qazanmış şagirdlər üçün təşkil olunur.
İmtahanda şagirdlərə tədris dili və riyazi təfəkkürü ölçən müxtəlif tipli suallar təqdim edilir. Müvafiq bal toplayan şagirdlər seçim mərhələsinə buraxılır. Qəbul olunan şagirdlər üçün sistemdə avtomatik sorğular yaradılır və sənəd qəbulu prosesi aparılır. Lisey seçimi 2 mərhələdə, ehtiyac olduqda isə 3 mərhələdə həyata keçirilir.
Mərkəzləşdirilmiş qaydada qəbul aparılacaq gimnaziya və liseylərin siyahısı:
Sumqayıt şəhəri Nizami Gəncəvi adına texniki və təbiət elmləri liseyi;
Sumqayıt şəhəri "Təfəkkür" liseyi;
Sumqayıt şəhəri təbiət elmləri təmayüllü gimnaziya.
Sumqayıt şəhəri humanitar və təbiət-riyaziyyat təmayüllü "İstedad" liseyi;
Hər bir müəssisə haqqında ətraflı məlumatı "Şagirdlərin elektron yerdəyişməsi" portalında "Mərkəzi imtahanlı liseylər" bölməsindən əldə edə bilərsiniz.
