Sumqayıt Dünya Məktəbinin müəllimi Yaşar Hüseynəliyev və şagirdi Mehrab Əlizadə "Sabahın Alimləri" yarışmasına layihə təqdim ediblər. Sumqayıt24 bu haqda 8 fevral tarixində xəbər verir.
“Zəlzələnin öncədən müəyyən edilməsi üçün yeni metod” adlı layihənin qısa icmalı:
“Bu metod indiyə qədər zəlzələni öncədən müəyyən edən metodlardan əsaslı şəkildə fərqlənir. Metodun yeniliyini izah etməyə çalışaq.
Aparılan ölçmələr zamanı xüsusi dozimetrlərdən istifadə olunur. Dozimetr radioktiv şüalanmaları qeyd edən cihazların növlərindən biridir. Sutka ərzində davamlı olaraq hər saatda ölçmələr aparılır. Nəticələr emal edilir. Bununla da zəlzələnin nə zaman baş verəcəyini sutka və daha öncədən söyləmək olur. Eksperimentin nəticələrini, süni intellektin metodlarından biri ilə müqayisə etdikdə, zəlzələnin baş verməsi zamanını, koordinatlarını, maqnitudasını 80% dəqiqliklə söyləmək mümkün olur. Bu nəticəyə 7 aylıq ölçmələrdən, onların analizlərindən sonra gəlmək mümkün olmuşdur. Ölçmələr müxtəlif mühitlərdə aparılmışdır, bu mühitlərin arasındakı fərqlilik və digər xassələrə əsasən, zəlzələnin baş verməsi haqqında fikir yürüdülür.
Xüsusi qeyd etməliyəm ki, mövzu ətrafında müzakirələr ilk öncə ADNSU-nun müvafiq kafedralarının birində, professor-müəllim heyəti ilə görüş zamanı aparılmışdır. Daha sonra sosial şəbəkələrin birində (Facebook) geniş kütlə, respublika və xarici ölkə alimlərinin müzakirəsi ilə aprobasiyadan keçmişdir”, - Yaşar Hüseynəliyev bildirib.
