Sumqayıtda qardaşını döyən şəxsə hökm oxunub.
Pravda.az-ın əldə etdiyi məlumata görə, Sumqayıt Şəhər Məhkəməsində qəsdən sağlamlığa az ağır zərər vurmada təqsirləndirilən İslam Muradovun (adı, soyadı şərtidir) cinayət işi üzrə məhkəmə istintaqı başa çatıb.
Hakim Günel İsmayılovanın hökmü ilə cinayət təqibinə xitam verilib və təqsirləndirilən şəxs cinayət məsuliyyətindən azad edilib. Onun barəsində seçilmiş başqa yerə getməmək barədə iltizam qətimkan tədbiri ləğv olunub.
İttihama görə, İslam Muradov qardaşı, zərərçəkmiş İlqarın (adı, soyadı şərtidir) sağlamlığının uzun müddətə pozulmasına səbəb olmuş əməl törədib.
Belə ki, 9 iyun 2025-ci il tarixdə saat 16:00 radələrində 13-cü mikrorayonda yerləşən mənzilin dəhlizində tərəflər arasında şəxsi münasibətlər zəminində mübahisə baş verib. Buna səbəb İslam Muradovun qardaşı, yəni zərərçəkmiş şəxsin arvadının zəng vurub mübahisə etməsi olub.
İstintaqla müəyyən edilib ki, mübahisə zamanı təqsirləndirilən şəxs İlqarın üz nahiyəsinə yumruq zərbələri endirib. Nəticədə zərərçəkmiş şəxsə sağ gözaltı nahiyənin sıyrığı kimi dərəcəsi təyin edilməyən xəsarət, qapalı kəllə-beyin travması, baş-beyin silkələnməsi, sağ paraorbital nahiyənin hematoması kimi sağlamlığın qısa müddətə pozulmasına səbəb olan yüngül bədən xəsarətləri yetirilib.
Həmçinin zərərçəkmiş şəxsə alt çənə sümüyünün sol şaxəsinin və sol maksilyar sinus divarının yerdəyişməyən sınığı, burun sümüyünün burunla tənəffüsü pozan sınığı kimi xəsarətlər yetirilib.
İslamın zərərçəkmiş şəxsə təpiklə sol böyür nahiyəsinə zərbə endirməsi nəticəsində solda VI–VII qabırğaların xətti sınığı kimi xəsarətlər yetirilib.
Məhkəmədə İlqar qardaşından şikayətçi olmadığını bildirib.
