Qızıl Aypara Cəmiyyəti Sumqayıt şəhər bölməsi bayram şənliyi təşkil edib. Sumqayıt24 bu haqda 26 dekabr tarixində xəbər verir.
“SOCAR Polymer” MMC-nin maliyyə dəstəyi ilə keçirilən tədbirə şəhid və qazi ailələrinin üzvləri, həmçinin hər iki valideynini itirmiş və sağlamlıq imkanları məhdud uşaqlar qatılıblar. Burada, həmçinin Sumqayıt şəhər İcra Hakimiyyətinin nümayəndəsi Tərlan Hacıyev, Milli Məclisin deputat köməkçiləri Elçin Kərimov, Cavid Quliyev, AzQAC-nin məsul əməkdaşı Elşən Səlimzadə, Renat Vəliyev, SOCAR Polymer MMC-nin əməkdaşı İlahə Hacıyeva, Şəfiqə Quliyeva və digərləri iştirak ediblər.
Onlar nahar süfrəsi ətrafında toplaşıb, şən musiqi sədaları altında rəqs ediblər. Aparıcı Hüseyin Səlimov maraqlı viktorinalar keçirib, qalibləri hədiyyələrlə mükafatlandırıb. Şaxta baba və nağıl qəhrəmanlarının çıxışları, müxtəlif oyunlar uşaqları sevindirib.
Musiqi Kollecinin müəllim heyətinin musiqiçiləri öz cıxışları ilə uşaqları şənləndiriblər. İştirakçılar bayram tortu kəsib, şam ağacı ətrafında yallı gediblər. Sonda uşaqlara bayram hədiyyələri paylanılıb. “SOCAR Polymer”in əməkdaşı İlahə Hacıyevaya isə bölmənin hazırladığı Təşəkkürnamə təqdim olunub.
