Sumqayıt şəhəri Tuğ-zavod qəsəbəsinin sakinlərini narahat edən bir sıra problemlə bağlı rəsmi açıqlama verilib. Bu haqda RealTV məlumat yayıb.
Sözügedən qəsəbənin 1000 nəfərdən çox əhalisi var. Onları burada mövcud olan antisanitar vəziyyət, yaşayış binalarının qəzalı olması narahat edir.
“Yerüstü axan kanalizasiya sularına həyətdə oynayan uşaqlar dəfələrlə düşüblər. Hətta bir dəfə uşağı xilas etmək mümkün olmayıb”, - deyə sakin bildirib.
Digər problem yolla bağlıdır. Belə ki, qəsəbədən Sumqayıta getdikdə, "geri dön" yol nişanı yoxdur. Bu səbəbdən sakinlər şəhər istiqamətində getdikdə 10 kilometrdən çox yolu qət etməli olurlar. Yəni onlar Ceyranbatanı keçib, geriyə dönməlidirlər.
Yaranmış məsələlər ilə bağlı aidiyyəti qurumlardan açıqlama verilib.
Sumqayıt şəhər İcra Hakimiyyətindən bildirilib ki, qəsəbədə mərkəzləşdirilmiş kanalizasiya xətti yoxdur. Lakin gələcəkdə bu məsələ həllini tapacaq.
Ərazidə olan qəzalı binalar haqda məlumat aidiyyəti qurumlara göndərilib. 3 binanın damı artıq təmir edilib, 3 binanın damı isə yaxın zamanda təmir olunacaq.
Azərbaycan Avtomobil Yollarından verilən açıqlamada bildirilib ki, yol nişanı ilə bağlı məsələ, qəsəbə sakinləri quruma müraciət etdikdən sonra araşdırılacaq.
