"Havalar soyudu, dəm qazı can aldı" sərlövhəli xəbərlərə artıq demək olar ki, hər gün rast gəlinir. Sumqayıtda və Azərbaycanın digər bölgələrində artıq bir neçə nəfər dəm qazının qurbanı olub. 2026-cı ilin yeni başlamasına baxmayaraq, bu cür faciələrin siyahısı artıq kifayət qədər uzundur.
Bəs dəm qazı niyə bu qədər can alır? Əsas səbəblər hansılardır? Doğru bildiyimiz, lakin əslində təhlükə yaradan yanlışlar nələrdir?
Kommunal xidmətlər üzrə ekspert Nüsrət Qasımov məsələ ilə bağlı mühüm xəbərdarlıqlar edib:
"İran peçləri və digər qızdırıcıların tüstü bacalarını pəncərədən birbaşa çölə çıxarmaq tamamilə yanlışdır. Bacalar dam səviyyəsindən ən azı yarım metr hündürdə olmalıdır. Bacaların üzərində mütləq qoruyucu "papaq" quraşdırılmalıdır ki, atmosfer çöküntüləri, quşlar və ya digər yad cisimlər ora düşməsin.
Bundan əlavə, hamam otaqlarının qapısının aşağı hissəsində kifayət qədər iri havalandırma deşikləri olmalıdır. Çünki qapı tam bağlı olduqda otaqdakı oksigen yanaraq tükənir və bundan sonra dəm qazının əmələ gəlməsi başlayır".
Mütəxəssislər vurğulayırlar ki, dəm qazından boğulma hallarının geniş yayılmasının digər əsas səbəblərindən biri də tüstü bacalarının vaxtında təmizlənməməsi və istilik sistemlərinə mütəmadi texniki baxışın keçirilməməsidir. Bu kimi laqeydliklər ağır nəticələrə və insan itkisinə səbəb ola bilər.
