Sumqayıtda rəssamın üzərində həftələrlə işlədiyi dekor silinib. Sumqayıt24 bu haqda 18 noyabr tarixində xəbər verir.
Sənətkar Laçın Bağırov sakinlərin xahişi ilə 15 nömrəli məktəbin divarlarını müxtəlif əsgər, şagird, polis şəkilləri və Azərbaycan Bayrağı-xəritəsi ilə bəzəyib. Bu işlər üçün o, həftələrlə vaxtını ayırıb. Lakin şəkilləri bitirməmiş havalar pisə doğru dəyişib və o, gözləməli olub. Bir gün durduqda isə əl işlərinin silindiyini görüb.
Rəssamın ailə üzvünün sözlərinə görə, kimsə xəritə rəsminin sonadək çəkilməsini gözləmədən Abşeron-Xızı Təhsil İdarəsinə şikayət edib:
“Həmin şəklin üzərində işlədiyi zaman boyası bitdi, sonra isə havalar dəyişdi. Rəssam bunu məktəbə gedən uşaqlarda xoş və maraqlı təəssüratlar yaratmaq üçün ürəkdən etdi.
Sadəcə şəkli bitirməyi çatdırmadı. Bunu da kimsə bağışlanmaz bir səhv kimi qəbul etdi və Təhsil İdarəsinə bildirdi. Qurumdan da gəldilər, bütün rəsmləri sildilər. Ən azından əl işinə, ayrılan vaxta və çəkilən zəhmətə hörmət qoya, rəsmin yarımçıq qalmasının səbəbini soruşa bilərdilər”.
