Sumqayıt şəhərində məskunlaşan keçmiş məcburi köçkünlərdən şikayət var.
Sumqayit24.az-a bu barədə keçmiş məcburi köçkünün özü - Südabə Səfərova məlumat verib.
Onun sözlərinə görə, Yaşıl Dərə yaşayış massivində məskunlaşdıqları yerin vəziyyəti şəraitsiz və olduqca acınacaqlıdır.
Sakin bildirib ki, həmin ərazidə əvvəllər yaşayış evi olmayıb, hansısa müəssisə fəaliyyət göstərib.
Qeyd olunub ki, xüsusilə yağışlı hava şəraitində evdə ciddi problemlər yaranır. Belə ki, yağış sularının evin içərisinə qədər daxil olduğu bildirilir. Bu isə evdə rütubətin yaranmasına, divarların zədələnməsinə və digər problemlərə səbəb olur.
"Hər yağış yağanda evimizə də yağır. Əlacsızlıqdan otağa müxtəlif qablar düzürük. Məsələ ilə bağlı aidiyyəti quruma müraciət etsək də, indiyədək ciddi addım atılmayıb", – deyə vətəndaş bildirib.
Sakinlər aidiyyəti qurumlardan əraziyə baxış keçirilməsini və mövcud problemin həll edilməsini xahiş edirlər.
