Başlanğıcını Sumqayıt Avtovağzalından götürən 509 nömrəli avtobusdan yenə şikayət var.
Sumqayit24.az-a daxil olan çoxsaylı müraciətlərə əsasən, sözügedən marşrut avtobusu ilə bağlı müxtəlif problemlər mövcuddur.
Vətəndaşların sözlərinə görə, marşrut üzrə avtobusların sayı az, intervallar isə həddindən artıq uzundur.
"Avtobusların azlığı və intervalların uzun olması səbəbindən istədiyimiz vaxt ünvana çata bilmirik. Uzun müddət gözlədikdən sonra avtobus gəlir, lakin sərnişin çoxluğu səbəbindən nəqliyyat vasitəsi dərhal dolur. Nəticədə yenidən gözləməli oluruq", - deyə sumqayıtlı şikayətçi bildirib.
Şikayətçilər aidiyyəti qurumlardan məsələnin araşdırılmasını və problemin həll edilməsini tələb edirlər.
Qeyd edək ki, məsələ ilə bağlı müvafiq quruma sorğu ünvanlanıb.
Xatırladaq ki, redaksiyamız tərəfindən 30 yanvar tarixində sözügedən avtobusun Lökbatan qəsəbəsinə daxil olmaması barədə şikayət işıqlandırılıb.
