Bu gün Sumqayıt Dövlət Dram Teatrının fəaliyyətə başlamsının 58-ci ildönümüdür.
Sumqayit24.az xəbər verir ki, Azərbaycan Nazirlər Sovetinin 12 mart 1968-ci il 105 saylı sərəncamı və Azərbaycan Mədəniyyət Nazirliyinin 10 iyul 1968-ci il 160 saylı əmrinə əsasən Sumqayıtda ilk professional kollektiv – Sumqayıt Dövlət Gənclər Teatrı yarandı. Öz pərdəsini 1969-cu ilin mart ayının 14-də Azərbaycan dramaturgiyasının banisi M.F.Axundzadənin "Müsyo Jordan və Dərviş Məstəli şah" məzhəkəsi ilə açdı.
1974-cü ildə Mədəniyyət Nazirliyinin qərarı ilə teatra "Sumqayıt Dövlət Dram Teatrı" statusu verildi.
Azərbaycan Respublikası Nazirlər kabinetinin 22 may 2015-ci il 195 saylı qərarına əsasən Sumqayıt Dövlət Dram Teatrı kimi fəaliyyətini davam etdirir.
Sumqayıt Dövlət Dram Teatrı Beynəlxalq və Respublika miqyaslı Teatr Festivallarında fəal çıxış edərək maraqlı və sanballı tamaşalar nümayiş etdirib. O cümlədən Rusiya Federasiyasının Moskva, Sankt-Peterburq, Türkiyə Respublikasının Ankara, Mersin, Hindistanın Yeni Dehli, Ukraynanın Donetsk və digər şəhərlərdə respublikamızı yüksək səviyyədə təmsil edib.
