Bu gün sumqayıtlı şəhidin doğum günüdür.
Ruslan Natiq oğlu İmanquliyev 1996-ci il 14 mart tarixində Sumqayıt şəhərində ziyalı ailəsində anadan olub. Ruslan kiçik yaşında olarkən atası ilə anası ayrılıb. Anası yeganə övladı olan Ruslanı tək böyüdüb. O, Sumqayıt şəhər H.Aslanov adına 22 saylı tam orta məktəbdə orta təhsil alıb. 2012-ci ildə həmin məktəbi bitirib və 1 nömrəli Sumqayıt şəhər Peşə Liseyinə qəbul olub. Ailəli idi.
Ruslan İmanquliyev 2015-ci il iyun ayında həqiqi hərbi xidmətə çağırılıb. Hərbi sahəyə olan marağı 2019-cu ilin dekabr ayında onu Azərbaycan Silahlı qüvvələrinin sıralarına qayıtmağa sövq edib. Ruslan İmanquliyev Pirəkəşkül qəsəbəsində N saylı hərbi hissədə Tank Əleyhinə Tağımın qumbaraatan komandiri vəzifəsində MAHHXH qulluqçusu vəzifəsində işləməyə başlayıb. O, işlədiyi müddətdə müxtəlif hərbi təlimlərdə aktiv iştirak edib.
2020-ci il 27 sentyabrda başlamış Vətən müharibəsinin ilk günündən düşmənə qarşı ön cəbhədə qəhrəmanlıqla vuruşub. Oktyabrın 2-si Füzuli istiqamətində gedən ağır döyüşlər zamanı şəhid olub. Sumqayıt şəhərinin Şəhidlər Xiyabanında dəfn olunub.
Prezident İlham Əliyevin Sərəncamlarına əsasən, İmanquliyev Ruslan Natiq oğlu ölümündən sonra "Vətən uğrunda" və "Füzulinin azad olunmasına görə" medalları ilə təltif edilib.
