Sumqayıt şəhərinin İnşaatçılar qəsəbəsində yaşayan sakinlər qaz təchizatında yaranmış problemdən narazıdırlar.
Baku.ws-in məlumatına görə, bir həftə əvvəl Azəriqaz tərəfindən göndərilən SMS bildirişində 17 fevral 2026-cı il saat 10:00-dan etibarən "Metallurq" küçəsində təmir işləri ilə əlaqədar qaz təchizatında müvəqqəti fasilə yaranacağı bildirilib və təminatın gün ərzində bərpa ediləcəyi qeyd olunub.
Sakinlərin sözlərinə görə, həmin gün əməkdaşlar əraziyə gələrək qaz xəttinin istiqamətini dəyişiblər. Onlara bildirilib ki, qaz məhəllənin digər başından veriləcək və təzyiq daha güclü olacaq.
Lakin iddialara əsasən, təmirdən sonra vəziyyət daha da pisləşib. Qəsəbə sakinləri qazın həddindən artıq zəif olduğunu, evlərin isinmədiyini və isti su əldə edə bilmədiklərini deyirlər.
"Məhəllə böyük olduğundan qaz bir başdan verildiyi üçün digər hissələrə çatana qədər təzyiq xeyli azalır".
Məsələ ilə əlaqədar "Azəriqaz" İstehsalat Birliyinin mətbuat xidmətindən bildirildi ki, problem bu günün sonuna qədər həll olunacaq.
