Sumqayıt vətəndaşlar yaşadıqları binada yaranan vəziyyətdən şikayətçidirlər.
Belə ki, 30-cu məhəllə, 2A/15 saylı binanın sakinləri bildiriblər ki, binanın ikinci blokunda yaşayan Aydın Əliyev 11 nömrəli mənzilinin həm ön, həm də arxa tərəfində qanunsuz eyvan tikib.
Vətəndaşların sözlərinə görə, binanın ön hissəsinə tərəf qanunsuz tikilən eyvanın dayaqları da möhkəm bərkidilməyib və daim tərpənir. Belə vəziyyət də kiçik uşaqların və digər sakinlərin təhlükəsizliyi üçün ciddi risk yaradıb.
Onlar həmçinin qeyd edirlər ki, 9-cu mənzildə sağlamlıq imkanları məhdud uşaq yaşayır və əlavə eyvan onların günəş işığından istifadəsini əngəlləyib.
Arxa tərəfdəki eyvan isə 13-cü mənzilin hüdudlarını keçərək pəncərəyə qədər yüksəldilib. Sakinlər binanın zəlzələyə dayanıqlığının şübhə altında olduğunu və əlavə eyvanın bu riski daha da artırdığını dilə gətiriblər.
Məsələ ilə bağlı A. Əliyevə edilən xəbərdarlıq nəticə verməyib. Onun cavabı belə olub: "Hər kəsin haqqın verib eyvan artırmışam, yaxşı edirəm, bacarırsınız, siz də edin!"
Binanın II blokunun, I və II mərtəbələrinin 9,13-cü mənzillərində yaşayan sakinlər aidiyyəti qurumlardan qanunsuz eyvanın sökülməsi üçün müdaxilə etmələrini xahiş ediblər. Şikayətçilər arasında Əhmədova Elmira İbrahim qızı və Qocayeva Sara Rafid qızı yer alıb.
Məsələ ilə bağlı Sumqayıt Şəhər İcra Hakimiyyətinin mətbuat xidmətinin rəhbəri Eyvaz Qocayev bildirib ki, tikili illər öncə edilib.
"Aidiyyəti qurumlara məlumat veriləcək və məsələ ilə bağlı yerində baxış keçiriləcək".
Mənbə: Konkret.az
