Bu gün Vətən müharibəsi şəhidi Elvin Zakirovun mövlud günüdür.
Azərbaycan Silahlı Qüvvələrinin baş leytenantı Elvin Ağasəlim oğlu Zakirov 1980-ci ildə Sumqayıtda anadan olub. Orta təhsilinə Zülfü Hacıyev adına 17 nömrəli məktəbdə yiyələnib. 2001-ci ildə ali məktəbdən məzun olaraq hərbi xidmətə yollanıb. Goranboy rayonunda, cəbhə bölgəsində xidmət edib.
Hərbi xidmətdən qayıtdıqdan sonra bir müddət 14 nömrəli məktəbdə fiziki tərbiyə müəllimi kimi pedaqoji fəaliyyət göstərib.
2002-ci ildə öz ərizəsi ilə yenidən hərbi xidmətə qayıdıb. Qazax rayonunun cəbhə xəttində yerləşən postlarda tağım komandiri vəzifəsini icra edib və xidməti dövründə baş leytenant rütbəsi alıb. Bir müddət Lənkəran və Astarada xidmət edib, səhhətində yaranan problemlərlə bağlı 2012-ci ildə ordu sıralarından ehtiyata buraxılıb.
Vətən müharibəsi zamanı Füzuli istiqamətində döyüşlərə qatılıb. Noyabrın 9-da Xocavənd-Şuşa istiqamətində gedən döyüşlərdə qəhrəmancasına həlak olub. Sumqayıt Şəhidlər xiyabanında dəfn edilib.
Ölümündən sonra Elvin "Vətən uğrunda", "Füzulinin azad olunmasına görə", "Xocavəndin azad olunmasına görə" və "Cəsur döyüşçü" medallarına layiq görülüb.
