Xəbər verdiyimiz kimi, Sumqayıtda bir ailənin 6 uşağı dəm qazından zəhərlənib.
Sumqayit24.az-ın əldə etdiyi məlumata görə, hadisə Xəzri bağları adlanan yaşayış massivində, çoxuşaqlı ailədə baş verib. Doqquz uşaqlı ailənin altı övladı hamam otağında dəm qazından zəhərlənib.
Uşaqların anasının sözlərinə görə, yaşları 1 yaş 6 aydan 14 yaşa qədər olan altı uşaq həyətdə palçıqla oynadıqdan sonra eyni vaxtda yuyunmaq üçün hamama daxil olublar. Bu zaman hamam otağında dəm qazından zəhərləniblər.
Ana dərhal qonşulardan kömək istəyib və onların yardımı ilə uşaqlara ilkin tibbi yardım göstərilib. Daha sonra zərərçəkənlər xəstəxanaya çatdırılıb.
Həkimlərin müdaxiləsindən sonra uşaqların vəziyyəti stabilləşib. Altı uşaqdan ikisinin müalicəsinin xəstəxanada davam etdirilməsi tövsiyə olunsa da, valideynlər onları da evə aparıblar.
Hazırda uşaqların vəziyyətinin normal olduğu bildirilir.
